Акафист
Пресвятой
Богородице
в честь иконы Ея, явленной на реке Дуниловке
Кондак 1
Взбранной Воеводе Божией Матери и Деве, даровавшей нам многие милости явлением чудныя своея иконы, похвальныя восписуем пения. Ты же, Пречистая Богомати, яко имущая Державу непобедимую, от всяких бед свободи и в небесныя обители введи, всех любовию зовущих Ти: Радуйся, Благодатная, иконою Твоею на путь спасения нас наставляющая.
Икос 1
Ангел и архангел превысшая, долу к нам грешным сошедши, благоволила еси явити икону Твою чудную, близ речки Дуниловки, на сучьях сухих висиму, ничем не поддержиму, и первее явися Диомиду поселянину. Сей же видя такое преславное чудо, со умилением и страхом, колена преклоня, вопияше Ти сице:
Радуйся, Благодатная Дево, пришествием Твоим дебрь лесную нашу озарившая.
Радуйся, в иконе Твоей Превечного Богомладенца милостиво нам явившая.
Радуйся, Михаила архангела и Илию пророка, яко ревнителей славы Всесвятаго имени Господня к подражанию нам приведшая.
Радуйся, молитвенников о нас теплых святителей Христовых Николая и Тихона, еще же и Параскеву мученицу в той показавшая.
Радуйся, тех явлением нас, хладных к молитве усердной призывающая.
Радуйся, через них Царствия Божия и правды его искати нас пробуждающая.
Радуйся, яко явлением Твоим Благословение свыше стране нашей приносиши.
Радуйся, яко матернее попечение о ней показуеши.
Радуйся на труды земледельцев милостивым оком Твоим взираеши.
Радуйся, яко изнемогающим в трудах земных сердца к Небу возводити научаеши.
Радуйся, им незримо помогаеши.
Радуйся, Благодатная, иконою Твоею на путь спасения нас наставляющая.
Кондак 2
Видя земледелец Диомид яко Пречистая к месту явления иконы благоволение показует, потщился усердно Той в велицем древе особое изсечь вместилище, и в оном благоговейно святую икону поставив, моляся взывая Богу: Аллилуия.
Икос 2
Разум имея свыше просвещенный, не скры под спудом сокровище, святую икону, благочестия ревнитель Диомид, но скоро шед в ближние веси возвестил людем о преславнем чуде: вернии же во мнозе из окрестных градов и весей к месту явления святой иконы на зов его спешно пришедши, поклонение за милостивое посещение Владычице приносяще со умилением взывали сице:
Радуйся, Дево и Мати радость нам с небеси иконы своея явлением принесшая.
Радуйся, отрадо наша, знамение милости иконою нам явившая.
Радуйся, заступнице усердная всего рода христианского от Бога дарованная.
Радуйся, покрове чудный страны Российския и надежда ея непостыдная.
Радуйся, путеводительница наша к отечеству Небесному всех возводящая.
Радуйся, красоты мира сего тленныя презирати наставляющая.
Радуйся, светом Евангелия Христова нас усердно просвещающая.
Радуйся, мрак неведения тем от многих отгоняющая.
Радуйся, заповеди Христовы соблюдати нас научающая.
Радуйся, любовию Божией через них души наши наполняющая.
Радуйся, покаянием сердца очищающая и двери райские
всем отверзающая.
Радуйся, Благодатная, иконою Твоею на путь спасения нас наставляющая.
Кондак 3
Силою веры влекомыя мирския люди с ближних и дальних церквей, слыша о дивном явлении святыя иконы Твоея, Владычице, на поклонение ей течаху и со слезами совершая пред иконою молебныя Тебе пения, благодарно поют Богу: Аллилуия.
Икос 3
Имущи несомненную надежду получити благодатную помощь от явленныя иконы Богородицы, многие люди приносили к сей иконе страждущих различными недугами. Ты же Благая Целительница наша, комуждо по вере подавала исцеления. Такой благодати в иконе сущей дивящеся, благодарне со слезами взываем Ти сице:
Радуйся, оставленных врачами на свои всемощныя руце приемлющая.
Радуйся, потребную помощь многим подающая.
Радуйся, слепых прозрение и хромых исправление.
Радуйся, глухих слышание и немых глаголание.
Радуйся, бесных мучимых зле, исправление.
Радуйся, рассудок потерявших внезапное просветление.
Радуйся, сиянием лика Твоего, мрак страстей наших прогоняющая.
Радуйся, согрешающим покаяния пути показующая.
Радуйся, благосердная Мати, детей твоих скорби скоро утоляющая.
Радуйся, от внезапныя смерти многих спасающая.
Радуся, усердно молящихся Тебе, Таин Святых причащения пред кончиною сподобляющая.
Радуйся, Благодатная, иконою Твоею на путь спасения нас наставляющая.
Кондак 4
Буря многих помышлений смущала ум благочестиваго земледельца Диомида, как сохранити святое сокровище – икону Твою, Богородице, невредиму от непогод и место ей достойное верным на поклонение устроити. Тобою же, о Пресвятая, в молитве наставляем и укрепляем, скоро с чадом своим деревянную часовню созидает и в ней явленную икону поставляет, радостно поя Богу: Аллилуия.
Икос 4
Слыша благочестивые люди, яко по некоторому времени минувшу, кончина жизни постигла Диомида, еще же и сына его Никиту, строителя ограды окрест часовни, и яко не стало ни единаго охранителя святыя иконы. Увидев же, яко и часовне той грозит падение от весенних речных разливов, намерение благое возымевше. Устроити храм на месте горнем, сопротив места явления святыя иконы, яко же указа сама Царица Небесная, жребием стрелы в оное место упавшей, не по долгом времени Богу помогающу, благоволением Пречистыя и благословением архиерейским, не только храм деревянный, но и обитель иноческая устроилася при нем; Егда же освятися храм, радовалися о сем люди окрест живущие и благодарно взывали Благодатней:
Радуйся, яко тобою вся наша желания благая исполняются.
Радуйся, яко Тобою ныне молитвы наши в дому Божием возносятся.
Радуйся, скорби наши в радость претворяющая.
Радуйся, в делах благих нам скоро помогающая.
Радуйся, икону Твою святую на радость нашу дивно сохранившая.
Радуйся, мысли благие о ней в сердца наши вложившая.
Радуйся, храм сей святый воздвигнути внушившая.
Радйся и устроити оный нам помогшая.
Радуйся и обитель устроити при храме архиерея Божия вдохновившая.
Радуйся, молитвы о нас прилежно в храме приносящая.
Радуйся, яко Тебе ради таинствами церковными мы здесь освящаемся.
Радуйся, яко через них жизни вечной причастники содеваемся.
Радуйся, Благодатная, иконою Твоею на путь спасения нас наставляющая.
Кондак 5
Боготечная звезда, сияющая нам во мраке сущим, явися икона Твоя, Владычице, лучами света невещественного нас просвещающая и спасительную благодать в сердца верных проливающая тепло Тебе молящихся и прилежно вопиющих Богу: Аллилуиа.
Икос 5
Видя, Пречистая, яко по некотором времени зело ослабела во иноках обители Ея ревность к богоугодной жизни коей вины ради и нерадения о почитании и прославлении Ея святыя иконы, среди верных чад церковных явися, попустити оскудению потребнаго в обители явити, а вскоре и упразднению ея быти, по сем же храму Ея первее к соседней Андангской, а по малом времени к соборней церкви града Никольска приписану быти, и иконе своей надолзе в том соборнем храме пребывати: люди же благочестивыя сицевому вразумлению Владычицы внимающе и попечению Ея о святей иконе своей дивящеся, со страхом благоговейно взывали Ей сице:
Радуйся, Преблагая Мати Божия, икону Твою яко дар Твой ценити нас побуждающая.
Радуйся, силу Христову ею возвещающая.
Радуйся, залог благоволения Твоего нам Тою явившая.
Радуйся, знамения и чудеса на нас обильно изливающая.
Радуйся, врачебную силу Твою ею всем показующая.
Радуйся, яко ограду и щит нам тою оставившая.
Радуйся, яко стеною от враг нас ею защищающая.
Радуйся, во всех нуждах ею верным способствующая.
Радуйся, почитающих образ Твой, под кров свой приемлющая.
Радуйся, потребным всем нас снабдевающая.
Радуйся, Благодатная, иконою Твоею на путь спасения нас наставляющая.
Кондак 6
Проповедует непрестанно обитель Дуниловская многие милости, явленныя в ней Царицей Небесной, идеже и до селе Она знаменует свое благодатное присутствие, источая обильно чудеса от святыя своея иконы, и скоро подавая всякую помощь всем, чтущим ея не только устами, но и сердцем верно вопиющих Богу: Аллилуия.
Икос 6
Воссияла яко светоч духовный многим градом и весем обитель Дуниловская явлением в ней чудныя Твоея иконы, Владычице, не только окрест Двины жувущия, но и с Поволжия многие приходят на поклонение святой иконе. Мы же такому благоволению Царицы Небесной дивящеся радостно Ей глаголем:
Радуйся, сердец благочестивых великое утешение.
Радуйся, Пресвятая Дево верных всех слава и похваление.
Радуйся, о всем мире к Сыну Твоему теплая предстательница.
Радуйся, о людех страны Российския изрядная попечительнице.
Радуйся, предстательством Твоим, наказания за грехи посылаемыя нам смягчающая.
Радуйся, в наказаниях без покрова Твоего яко в скорбех нас не оставляеши.
Радуйся, яко кающимся в грехах скорое прощение от Бога приносиши.
Радуйся, страх Божий стажати нас научающая.
Радуйся, им вечных мук нас избавляющая.
Радуйся, тем премудро к блаженному Царству многих направляющая.
Радуйся, к Вечному Царству многих призывающая.
Радуйся, Благодатная, иконою Твоею на путь спасения нас наставляющая.
Кондак 7
Хотяще Владычице невозбранно в храме Ея хваления, благодарения, покаяние и прошения Ей во множестве приходящие люди да приносят. Положила еси на сердца их во имя Ея новый просторный храм создати они же улучив желаемое, радостно воспевали в новом храме хвалебное Тебе пение и Богу усердно вопияли: Аллилуия.
Икос 7
Новые великие знамения ичудеса от иконы Твоея, Пречистая, в недавние времена бывшия дивимся неиссякаемому источнику благодати в ней сущей и велегласно исповедующе с веселием зовем Ти:
Радуйся, Пречистая, и поныне врачебную помощь подающая.
Радуйся, от бед многих нас спасающая.
Радуйся, Рыстюга Верхняго поселян от черной оспы избавившая.
Радуйся, смертную язву сию по молебствии совсем отгнавшая.
Радуйся, старицу некую, мучимую от злаго духа
уврачевавшая.
Радуйся, люто расслабленному телу ея крепость даровавшая.
Радуйся, образ Твой, яко новую купину неопально нам явившая.
Радуйся, им град Никольск дивно от огня исхитившая.
Радуйся, иконы Твоея обнесением великий в нем пламень угасившая.
Радуйся, Ею пламень веянием ветра вверх устремившая.
Радуйся, многих слепых сердцем светом веры просвещающая.
Радуйся, Благодатная, иконою Твоею на путь спасения нас
наставляющая.
Кондак 8
Странствованию на земли Владыки и Христа и Сына Твоего подражающи, на небеси же вечному Его со Отцем пребыванию подобящеся, иконою Твоею, Владычице, из града в град, из веси в весь приходиши, обаче же святынею Твоею на земном месте явления неизменно пребываеши, да многия люди зрением лика божественнаго Твоего просвещаемии, немолчно прославляют Тя и Сыну Твоему поют: Аллилуия.
Икос 8
Вси вернии раби Твои Дево и Мати желением вожделевают видети иконы Твоея светлейший лик не только в храме Твоем, но и в весех, и в домах прияти Тя желают, и радуяся милостивому Твоему посещению благодарно взывают сице:
Радуйся, благодатным посещением Твоим нас сладце увеселяющая.
Радуйся, оным мрак греховный от нас отгоняющая.
Радуйся, яко молитвами Твоими прозябение хлебов нам испрошаеши.
Радуйся, яко от глада и мора многих избавляеши.
Радуйся, яко иконою Твоею тлетворность воздуха изменяющая.
Радуйся, благорастворение ему дающая.
Радуйся, земныя злаки на полях взращивающая.
Радуйся, поля от вредной мокроты и засухи избавляющая.
Радуйся, озимовыя ржи деревни Дор от червобоя свободившая.
Радуйся, птиц на поля пославшая и ими червь тот истребившая.
Радуйся, яко о чуде сем часовня веси той возвещает.
Радуйся, Благодатная, иконою Твоею на путь спасения нас наставляющая.
Кондак 9
Всякий с сокрушенным сердцем приходящий к Твоея иконе, о Богомати, и в покаяннем чувстве ревнующий тепле об исполнении заповедей Сына Твоего, приемлет от Тебя благодатную помощь, и всякое прошение Ты скоро исполняеши, да непрестанно благодарно вопиет он Богу: Аллилуия.
Икос 9
Многия, благодати Духа Божия не имущие, дерзают в ослеплении почитание икон яко суеверие отметати, чудеса же и знамения от них бываемыя ни во что вменяти. Мы же слепоту ума и сердца отрясше и верою живою просвещаемыя, благодать Духа Святаго, присущую иконам твердо исповедуем и икону Твою верою почитаем и с любовию ея благоговейно лобызаем, и к той яко к Самой Ти благодатию в ней сущей умильно взываем:
Радуйся, Честнейшая Херувим и Славнейшая Серафим, Небеси и Земли Царица.
Радуйся, спасителя всех Христа светлейшее жилище.
Радуйся, рода христианскаго державная заступнице.
Радуйся, спасения нашего милостивая ходатаице.
Радуйся, чад своих иконою яко омофором покрывающая и спасающая.
Радуйся, врагов Церкви, тою яко громом устрашающая.
Радуйся, с верою молящихся Тебе, сердца просвещающая.
Радуйся, яко из ветхих в новых претворяющая.
Радуйся, усердно прославляющих Тя дары благодати сообщающая.
Радуйся, Благодатная, иконою Твоею на путь спасения нас наставляющая.
Кондак 10
Спасение души ищущие люди многия притекают в обитель Твою, Богородительнице, отрясши с души яко прах мирскую суету и грехов тяготу, с утешением в домы своя отходят, росою молитв Твоих окропленныя, иныя же долго зде пребывают, благодарственное служение иконе Твоея совершающе и немолчно вопиюще: Аллилуия.
Икос 10
Стена еси Богородице Дево всем к покрову Твоему прибегающим, наипаче же в храме Твоем словесную Ти службу приносящим, воспевающим Ти:
Радуйся, верных столпе и девства ограждение.
Радуйся, церквей и обителей украшение и утверждение.
Радуйся, юных целомудрия учительнице и воздержания оным наставнице.
Радуйся, старцев и стариц благоговейных мирное упокоение.
Радуйся, домов и супружеств благочестивых благословение.
Радуйся, матерей скорбящих скорое утешение.
Радуйся, дев и вдовиц чистых непрестающее веселие.
Радуйся, сирых и болящих сладкое упокоение.
Радуйся, молящимся Ти дарующая всецелое очищение и освящение.
Радуйся, мира отрекшихся благ вечных нетрудное стяжание.
Радуйся, ревнителей благочестия слава и похваление.
Радуйся, Благодатная, иконою Твоею на путь спасения нас наставляющая.
Кондак 11
Пение благодарственное и благоприятное Ти до конца дний жизни вожделевая приносити, усердно молим Тя, Владычице, подаждь нам веру непостыдну и любовь нелицемерну, да присно
сердцем чистым и устнами нескверными умильно прославляем Тя и Богу радостно поем:
Аллилуия.
Икос 11
Светозарное светило воистину явилося нам во тьме греховной сущим икона Твоя, Богородице Дево, светом Богопознания просвещающая и к деланию заповедей наставляя всех, благодать и силу чрез икону Твою являемую ведуще разумно поющих Ти сице:
Радуйся, светило незаходимаго света присно нам сияющее.
Радуйся, Христа Бога прекрасное селение.
Радуйся, неиссякаемое миро на труды человеческия излиянное.
Радуйся, Рая Христова древо чудоточное и живоносное.
Радуйся, манно Небесная благодатию всех питающая.
Радуйся, молитву о нас яко кадило благовонное к Богу возносящая.
Радуйся, духов злобы от верных державно отгоняющая
Радуйся, ангелов светоностных в помощь нам посылающая.
Радуйся, пастырей церкви в служении укрепляющая.
Радуйся, пасомых о пастырех молитися научающая.
Радуйся, благодатию яко огнем небесным в покаянии живущих просвещающая.
Радуйся, Благодатная, иконою Твоею на путь спасения нас наставляющая.
Кондак 12
Благодать свыше, Владычице, Твоей святей иконе даровася: болезни исцеляти, страсти душевныя врачевати, к покаянию возбуждати и огненную ревность в сердца к деланию Христовых заповедей влагати, да вси приходящия к Тебе любовию одушевляемыя присно поем Богу благодетелю: Аллилуия.
Икос 12
Поем и исповедуем Твоея неисчетныя милости явленныя роду человеческому и нашему отечеству, Благословенная от всех родов Богородице Пречистая и к Тебе яко к Матери нашея, Неусыпной молитвеннице и непрестанной Ходатаице мы, дети Твои, прибегаем и благодарно взываем:
Радуйся, Церкви Христовой непоколебимое утверждение.
Радуйся, ищущим спасения пристанище и успокоение.
Радуйся, тесным путем идущим, опора и заступление.
Радуйся, в скорбех и напастех сущим несомненое надеяние и поможение.
Радуйся, благим намерениям к Тебе притекающим способствующая.
Радуйся, всякий труд полезный с молитвою совершаемый радостно благословляющая.
Радуйся, благодатию терпения и смирения снабдевающая.
Радуйся, терпящих болезни и скорби венцами небесными украшающая.
Радуйся, на земли тех благодатию смирения и терпения укрепляющая.
Радуйся, в любви духовней пребывающим кончину христианскую посылающая.
Радуйся, немилосердия и осуждения грехи карающая, и блюстися их нас научающая.
Радуйся, простых и незлобивых от всех бед покрывающая.
Радуйся, Благодатная, иконою Твоею на путь спасения нас наставляющая.
Кондак 13
О, Премилостивая Мати Сладчайшего Искупителя нашего Господа Иисуса Христа, нынешнее наше приемше приношение, поданной Ти от Сына Твоего благодати от всех бед и напастей охраняяй и избавляяй и причастниками вечной блаженной жизни соделывай всех любовию чтущих Тя и в Троице славимому Богу вопиющих:
Аллилуия, аллилуия, аллилуия.
13-й Кондак глаголи трижды, а затем:
Икос 1 (Ангел и архангел…)
Кондак 1 (Взбранной Воеводе…)
Молитва.
Надеждо и Предстательнице наша пред Богом, Пресвятая Дево Владычице Богородице, токи чудес от святаго Твоего образа обильно нам и поныне источаются, вонми многоболезным воздыханиям душ наших, умоли Сына Твоего Христа Бога нашего ниспослати благодать Духа Святаго нам, чадам Церкви Его святой, и даровати нам силу и крепость твердо и непоколебимо хранить спасительныя Христовы истины веры, обряды и уставы церковныя, святыми вселенскими соборами установленныя и нам преданныя, тепле предстательствуй пред Ним о нас, многогрешных. Заступнице усердная наша, да простит Он нам вся грехи и неправды наша в мимошедшия годы и до сего часа содеянныя, и да избавит Отечество наше от глада, мора, от междоусобныя брани и от всякия скорби и нужды, праведным судом Его за грехи на землю нашу посылаемыя. Да низведет Он Всеблагий в сердца наша духа страха Божия, от грехов ограждающаго. Яко да святится и прославляется нами чудное и Пресвятое имя Его, да утверждается среди нас благочестие, нерушимый мир, братская любовь и согласие. О, Преблагая Царице наша, помощь нам всем чтущим Тя благословение Твое на мирные труды и дела наша, да богоугодно поживем и сподобимся вси христианския кончины и неизреченныя радости непрестанно пети Тя во славе небесной и немолчно славословить Христа Спасителя нашего со Отцем и Святым Его Духом в бесконечные веки. Аминь.
Молитва.
О, Пресвятая Преблагословенная Дево Богородице, Царице и Владычице наша, со страхом и любовию припадаем пред честною иконою Твоею, благословения Твоего и помощи просяще на все мирныя труды земной всей нашей жизни, и на труды ко спасению душ наших потребныя. Помоги нам не уклонятися с теснаго пути, вводящаго в жизнь вечную. Вложи в сердца всех нас страх Божий и память смертную от грехов и страстей ограждающих, возгрей в душах наших любовь и ревность к исполнению животворящих заповедей Христа Сына Твоего. Умягчи окамененныя сердца наша теплотою покаяния, сокрушенною молитвою, чувствами благопожелания и делами милосердия. Просящих пред святою иконою Твоею врачевания болезней телесных и душевных страстей и всякому согласно полезное по требе даруй.
Заступница наша усердная, умоли Сына Твоего, да сохранит Святую церковь Его тверду и непоколебиму в хранении истин веры, обрядов и уставов, Святыми Вселенскими соборами утвежденных. Да не отступит благодать и милость Его от верных чад Его, сынов и дщерей страны Российския. Да простит он грехи в мимошедшие годы и дни до сего часа содеянные. Да избавит Отечество Российское от глада и мора, от междоусобныя брани и от всякия скорби и нужды, за грехи от Бога людям посылаемыя, да водворится в ней и царствует твердый и нерушимый мир, единение, братская любовь и согласие. Предстательствуй о нас перед Господем Славы, Царице Небеси и Земли, и при отхождении каждого из жизни сей, да будет кончина наша безболезненна, непостыдна и мирна, с драгим напутствием к вечной жизни — причащением Святых Таин Тела и Крови Христовых, дабы с восприятием сего залога жизни вечныя, избегнуть нам лютых мытарств и вечных мучений, и безбедно и радостно достичь нескончаемаго блаженства жизни вечныя. Аминь.
